Eimsbütteler Buddelbreven: Plattdüütsche Böker? Na kloor!

Ben, wat de Jung vun mien Macker Bo is, weer annerletzt mal mit sien Schoolklass bi’n Bökerhöker. Dat weer an’n „UNESCO Welttag des Buches“. De Lehrerin wull de Kinner mal wiesen, wat echte Böker sünd. Böker, de een ut’t Schapp ­nehmen un opklappen kann. Böker, op de man nich mit’n Finger rümwischen mutt.

Bi „Lüders“ kregen de Kinner denn grote Ogen. So vele smucke Böker un sünnerlich de olen, de noch in Schwiensledder inbunnen weren! Och, wat weer dat fein!

Se schullen sik denn ok sülvst mol ’n beten ümkieken in’n Laden un dor fraag Ben de Verköpersche doch glatt na plattdüütsche Böker. De kunn he nämlich nich finnen. Villicht weren se jo ganz baven op’t Bord, wo he nich ranlangen kann, oder se ­stunnen in de twete Reeg versteken achter de annern Böker?

De Fru weer verdaddert un see, dat de Lüüd keen plattdüütsche Böker mehr lesen wullen. Se kunn dor nix bi maken. Man wat se doon kunn … se kunn plattdüütsche Böker bestellen.

Bestellen? Dat wull Ben doch glieks mal versöken. He harr sik dat jo nu man partout in’n Kopp sett: He wull en plattdüütsch Book lesen, keen hoochdüütschet. Mit Cool wie Bolle, dat lütt Book, dat se all amenn vun ­ehren Besöök kriegen schullen, kunn se em nich locken.

Nach plattdeutschen Büchern gibt es bei uns keine Nachfrage mehr, ver­kloor se em, man Ben meen, dat weer jo woll nich wohr. He harr ehr doch jüst na plattdüütsche Böker fraagt. Jo, dat harr he woll, müss se denn ­togeven. Un so hebbt de beiden sik denn tohoopsett un in’n Rekner na platt­düütsche Böker söcht.

Keine Nachfrage nach plattdeutschen Büchern mehr? Ik meen: Dat kann doch nich angahn. Gaht man fix hen na joon Bökerhöker, leve Lüüd, un fraagt na den niegen Band vun Vertell doch mal mit de Geschicht vun Felicitas Schröder ut Eimbüttel oder na Schrievkraam, en Book, wo ok en lütt Text vun Ben un sien Vader binnen­steiht. En plattdüütsch Book – mi dücht, dat is ok en fein Geschenk för Wiehnachten!

Joon Plattsnacker vun’t Kreativhuus

Text: Heiko Thomsen

Wöörverkloren

achter – hinter
amenn – schließlich, am Ende
annerletzt – neulich
baven – oben
Besöök – Besuch
Bökerhöker – Buchhändler
Bord – Regalbrett
fix – schnell
glieks – gleich
jüst – gerade
Macker – Freund, Kollege
man – aber
ok – auch
opklappen – aufschlagen
partout – absolut
ranlangen – heranreichen
Reeg – Reihe
Rekner – Rechner, Computer
Schapp – Schrank
see – sagte
söken – suchen
sülvst – selbst
sünnerlich – besonders
Swiensledder – Schweineleder
togeven – zugeben
tohoopsetten – zusammensetzen
verdaddert – verdutzt, verblüfft
Verköpersche – Verkäuferin
verkloren – erklären
versöken – versuchen
vertellen – erzählen
villicht – vielleicht
wiesen – zeigen
woll – wohl