Ümtuschen
Wiltrud Rosenkranz ist 86 Jahre alt und lebt seit mehr als 50 Jahren im Stadtteil. Was in Eimsbüttel heute los ist, beobachtet sie gerne mit einem Augenzwinkern. Für die Eimsbütteler Nachrichten notiert sie ihre Beobachtungen und Anekdoten auf plattdeutsch. An Weihnachten ist Wiltrud Rosenkranz etwas aufgefallen.
Von Wiltrud RosenkranzNu is Wiehnachten ok all vorbi. Man wat loppt de Tied. Ober dütt Johr wär dat allns ganz anners. De een vun uns grote Kinner har een Musikwunsch – dor kennt Oma un Opa nix fun – also Piselotten in Umschlag. Sien Frau wünscht sik wat an so moderne Kledasch – dor kenn wi nix fun – gifft een Gutschien.
De Jüngeren wullt wat to ehrn Dattelkasten – Oma un Opa kennt nix von de neumodsche Technik – gifft Piselotten in Umschlag. De annere Oma kregt een Gutschien von ehrn Lieblingsloden. So, un in nullkommanix wär de Bescherung to Enn, denn jedeen kreg blots een Umschlag. Ok wi beiden kreg en – ober mit tolle Theoterkorten. De Stuv wär fien sauber – keen Geschenkpapier (fröher hebt wi dat noch bögelt, kunn jo noch mol brukt warn.)
Keene Päckchen – kenne bunten Bänner. Spät obends seggt Opa to Oma: „So richtig komodig wör de Hilligobend ober dit Johr nich.“ Keene Päckchen, keen Papier, kene Bänner. „Jo“, seggt Oma, „hest Recht. Blots Umschläg tuschen. – Nee, wie goht wedder inkeupen. Lot se doch ümtuschen. Dor hebbt se ehr Grött und ehr Farf. Un wi dattel uns doch noch in den neumodsche Krom.“
Hilligobend ohne Päckchen un bunte Bänner – is wi Silvester ohne Papierschlangen un ohne Berliner.
