Eimsbütteler Buddelbreven: En Stück vun’t Glück

De Eimbüttlers sünd woll glückliche Minschen, glöövt mien Besöök ut Berlin. All de smucken Hüser ut de Jugendstil-Tiet, de vergnöögten Lüüd in de proppenvullen Cafés un Spieslokalen in de Osterstraat. De hebbt dat woll goot hier.

»Nich all«, segg ich, »dat gifft hier ok männicheen, de nich fief Euro för en Stück Koken oder en Matcha Latte betahlen kann. De hebbt ok keen, mit den se mol in’t Café gahn un snacken köönt. De hebbt villicht nich mal en Platz to’n Slapen.«

Un denn vertell ik em vun de Suppenköök vun de Kathoolsche Kark an’n Weiher, wo du Sünnavend meddags vun Klock twölf bit Klock twee hengahn un wat Feins to’n Eten kriegen un snacken kannst. Meist so as in en Restorang. De Köök gifft dat al dörtig Johr. De Lüüd bruukt nix to betahlen un dat Eten smeckt allerbest. Dor kriggst nich blots Suppen, man ok lecker Oplööp, Grööntüüch, Aavt, Koken und wat to’n Drinken – allens spendeert vun de Naverschop. Wenn dat nich langt, warrt sülvst noch wat kaakt. Muttst ok nich beden oder di latiensche Gesäng anhören. De Gäst un de ehrenamtlich Mitarbeiders sünd kathoolsch, evangeelsch, muslimsch – is schietegal wat – oder se hebbt gor nix mit Gott un de Kark an’n Hoot. Jeed Mal kaamt dor so bummelig an de dörtig bet föfftig Lüüd vörbi un de Mitarbeiders dreegt den Kaffee op, füllt de Töllers, snied dat Broot, rüümt af un wascht af. Wenn de Tiet dat tolett, kannst di ok to de Gäst mit tosetten un mitkakeln. Un de Mitarbeiders glöövt all an desülve Saak: Wenn di dat sülvst goot geiht, kannst ok wat torüch geven an de Lüüd, de dat nich so goot hebbt.

Neegsten Sünnavend is wedder Suppenköök. Hest nich villicht Lust, mol en Appelkoken vörbi to bringen? Dat is jümmers en besünner Freud för uns Gäst. Kannst ok en Stück vun afhebben. Wenn du wullt, ok mit Slackermaschü.

Joon Plattsnacker vun’t Kreativhuus

Text: Heidi Nölker & Felicitas Schröder

Wöörverkloren

Aavt – Obst
afhebben – abbekommen
afrümen – abräumen
al – schon
all – alle
an’n Hoot – am Hut
Appel – Apfel
beden – beten
Besöök – Besuch
betahlen – bezahlen
blots – bloß, nur
bummelig – hier: knapp, ungefähr
gliek – gleich
glöven – glauben
Grööntüüch – Grünzeug, Gemüse
Hüser – Häuser
kaken – kochen
Kark – Kirche
keen – kein, niemand
Koken – Kuchen
Köök – Küche
Kunnen – Kunden
latiensch – lateinisch
männicheen – manche, mancher, manchen
meddags – mittags
meist – fast
Naverschop – Nachbarschaft
neegsten – nächsten
ok – auch
Oplööp – Aufläufe
Restorang – Restaurant
Saak – Sache
Slackermaschü – Schlagsahne
slapen – schlafen
smuck – hübsch, schön
snacken – sprechen
snieden – schneiden
sülvst – selbst
Sünnavend – Sonnabend
Töller – Teller
tolaten – zulassen, erlauben
torüch – zurück
vertellen – erzählen
vörbi – vorbei
wedder – wieder