Eimsbütteler Buddelbreven: Mann in Swart

De Eimbüttlers hebbt Sott, se hebbt Wolfgang. Wolfgang is bekannt as ’n bunten Hund, liekers he sik heel in Swart antrecken deit. Wenn he op sien Fohrrad dörch den Stadtdeel kajohlt, grööt em de Lüüd un winkt em to. Un he kann ornlich in de Pedalen pedden, denn he is ok mal den Giro d’Italia föhrt. Un dat nich achteran. In sien pickenswarten Pirate Style Ledderjack mit de güllen Knööp, de hier un dor al ’n beten blank is, wiel em de Lüüd
ok driest angrabbelt, un mit sien swarte Büx un Schöh is he ’n bannig smucken Hamborger Jung. Af un an dreegt he ok ’n swarten hogen Hoot. Dor mut he oppassen, dat de em nich wegweiht.

Een, twee Mal in’t Johr steiht he för mien Döör. Denn bün ik an’e Reeg för en Besök. He kümmt nu meist an de veertig Johr. Dat swarte kruse Hoor is nu gries un ok weniger worrn, man dat maakt nix. Wenn he rinkümmt, bringt he jümmers en flotten Snack un gode Luun mit. En beten charmeren deit he ok geern mit de ole Fruunslüüd. He weet, dat he de dor en Freid mit maakt. De kringelt sik un grient. Se weet, dat dat nix anners för em gifft as sien Fru un siene twee groten Bengels.

Wenn he to Besöök kümmt, denn will he ok kieken, dat di nix passeren kann. He stiggt di to’n Bispeel op’t Dack un kickt in den Schosteen rin, of sik en Vagel dat dor kommodig maakt hett oder de Wiehnachtsmann stekenbleven is, dat du nich avends blang dien Aven inslöppst un morgens nich mehr opwaken deist. He pröövt ok, of dat noch bi di piept. Dorför geiht he an de Deek. Un denn kickt he noch, of dien Warms noch goot löppt un gifft di Ratslääg un hölpt di. He weet, wat een allens bi dat dösige niege Batteriegesett in’t Oog hebben mutt.

De Lüüd, de en Zentralwarms un keen Etagenwarms in Eimbüddel hebbt, doot mi leed. De verpasst en vergnöögt Sottje, de di so gode Luun maakt, dat he ok al mal as de »Hamburger des Tages« in’n Kiekkassen weer.

Joon Plattsnacker vun’t Kreativhuus

Text: Felicitas Schröder

Wöörverkloren

achteran – hinterher
af un an – manchmal
al – schon
allens – alles
antrecken – anziehen
bannig – sehr
Bengels – hier: Kinder
Besöök – Besuch
blang – neben
Büx – Hose
Dack – Dach
Deek – Decke
Döör – Tür
dregen – tragen
driest – dreist, frech
flott – hier: locker
Fruunslüüd – Frauen
gries – grau
hebben – haben
heel – ganz

hogen – hohen
jümmers – immer
kajohlen – herumfahren
Kiekkassen – Fernsehapparat, Glotze
Knööp – Knöpfe
kommodig – bequem
kruus – kraus
liekers – trotzdem
Luun – Laune
man – aber
meist – fast
niege – neue
Oog – Auge
op’t – auf das
ornlich – ordentlich
pedden – treten
pickenswart – pechschwarz
pröven – prüfen
Reeg – Reihe
Schosteen – Schornstein
Snack – Spruch
Sott – Glück
Sottje – Schornsteinfeger
swart – schwarz
Warms – Wärme, Heizung
weten – wissen