Eimsbütteler Buddelbreven: Över de Heck

De Eimbüttlers sünd mehrstendeels nich schu. Bruukst di blots op de Bank vör’n Kiosk in’n Stellinger Weg oder vör de Iesdeel op’n Fanny-Mendelsohn-Platz to setten un swupps finnst een to’n Snacken. Oftins sünd dat Mannslüüd, de di de Welt verklookfiedeln wüllt. De vertellt di, woans de Welt funktioneert för nix. Jeedeen Dag kaam ik en beten kloker na Huus.

Man ik mutt gor nich so wiet gahn. Ik mutt blots in mien Vörgoorn rümprökeln oder mit de Heckenscheer togang sien, denn kümmt ok al een vörbi: »Düchtig, düchtig. Kannst glieks bi mi wiedermaken.«

Wenn ik dat Wildkruut mang de Plaastersteen rutpuul: »Woso sprüttst nich Plantengift, denn muttst di nich so rünnerduken?« Oder »Woso köffst di nich en Akkuscheer? Geiht doch veel gauer«. Dor denk ik denn över na. Männichmal kümmt ok een, de hett wohrschiens den helen Dag nüms to’n Snacken hatt un nu höllt he mi en langen Vördrag över Putin un sien Moder. Dat mag jo allens angahn oder ok nich. Man bün ik nu kloker?

Eensdags weer ik wedder an’t Heckenköppen, dor kümmt en Mann vörbi un sabbelt in en unverständlich Spraak in sien Handy. Na’n halve Stünn kümmt he wedder torüch un is jümmers noch an’t Sabbeln. Wat he woll to vertellen hett?

Ik mutt grienen un fraag em över de Heck, of he al wedder sabbelt oder jümmers noch. He kümmt to mi röver. Lacht ut Hartensgrund. Witte Tähn sünd an’t Blitzen. »Wat is dat för en Spraak?«, fraag ik. »Franzöösch«, antert he.

»Wat? Ik heff doch Franzöösch lehrt. Du snackst so rapp as en Boomhacker hackt«, segg ik. He lacht wedder. »Wo ik herkaam, dor snackt wi all so.« He kümmt vun de Elfenbeinküst. Dor is Franzöösch Amtsspraak.

»Wi hebbt hier ok en Amtsspraak«, segg ik ’n beten dummstolt, »dat is Düütsch, man wi hebbt ok noch en anner Spraak un dat is Platt. Dor gifft dat mehr as dörtig Varianten vun. Mekelborgsch is anners as Brannenborgsch un de Dithmarschers snackt anners as de Lüüd in’n Harz.«

»Jo«, antert he, »un wi hebbt över söventig Spraken un Dialekten: Bambara, Dioula, Neyo…« Nu bün ik platt. Wat för en komplex Kultur! Ik will mehr weten. De Heck mutt töven. He vertellt mi wat vun Attiéké, Couscous ut Maniok, un maakt mi dat Muul waterig. Dat will ik nu woll mal proberen. Af un an lehrst doch wat över de Heck. A bientot, Monsieur.

Joon Plattsnacker vun’t Kreativhuus

Text: Felicitas Schröder

Wörterbuch

al – schon
antern – antworten
blots – nur
Boomhacker – Specht
bruken – brauchen
dörtig – dreißig
för nix – umsonst
gau – schnell
Hart – Herz
Heck – Hecke
heel – ganz
Iesdeel – Eisdiele
jümmers – immer
klook – klug
lehren – lernen
nüms – niemand
man – aber
männichmal – manchmal
mehrstendeels – meistenteils
of – ob
oftins – häufig
över – über
rapp – schnell
schu – kontaktscheu
söventig – siebzig
stolt – stolz
Tähn – Zähne
töven – warten
verklookfideln – erklären
vertellen – erzählen
vörbi – vorbei
Vörgoorn – Vorgarten
wedder – wieder
witt – weiß
woans – wie
wohrschiens – wahrscheinlich