Eimsbütteler Buddelbreven: De Quickborn stellt sik vör

De »Quickborn« (Vereinigung für plattdeutsche Sprache und Literatur e.V.) hett sik op de Fahn schreven, de plattdüütsche Spraak to plegen un to hölpen, dat se lebennig blifft. Dorför geevt se veermol in’t Johr den »Quickborn« rut, en Tietschrift mit plattdüütsche Literatur, Opsätz, Rezensionen un Narichten ut de plattdüütsche Welt un vele anner Saken mehr. De Vereen is 1904 in Hamborg gründt worrn, man de »Quickies« sünd nich vun güstern, se kiekt ok över den Töllerrand, wat hüüttodaags un in anner Ecken vun Plattdüütschland los is. Liekers hett de Vereen Towass bannig nödig. He bruukt vör allen ok Lesers un Lüüd, de af un an mal en Bericht över en Veranstalten oder en Rezension schrievt. Dat kriggt de Redaktschoon nich allens alleen op de Reeg.

De beste Gelegenheit, den Vereen kennentolehren is förwiss de »Quickborn-Dag« in’t Vörjohr – mit Johrsversammeln, Vördrääg, Lesen un Kunzerten. Jeed Johr gifft dat en anner Thema: 2025 »Boy Lornsen« un dit Johr »Hertha un Wolfgang Borchert«. De Quickborn-Lüüd maakt ok Lesungen, to’n Bispill an’n Plattdüütsch-Dag in’n April, bi’n Seniorendag in’t Butenmuseum »Kiekebarg« oder an’n Mittsommer in de Nedderdüütsche Bökerie. Jeed Johr in’n November is de Vereen mit en Stand op de Plattdüütsche Bökermess in’n Lichtwarksaal an’n Start. Jeed tweet Johr warrt de Quickborn-Pries utgeven (»für besondere Leistungen auf dem Gebiet der niederdeutschen Sprache, Literatur oder volkskundlichen Forschung«). Ünner de Priesdrägers ut verleden Johren weren Heinrich Thies (2020), Christa Heise-Batt (2022) un dat Verlegerehpoor Peer-Marten un Gesche Scheller (2024). För ehren Johrsbidrag kriegt de Liddmaten veer Heften un – wenn’t jichtenswo mööglich is – ok en Johrsgaav (meist en nie’et plattdüütsch Book oder en CD). Tööv man nich to lang un kiek di glieks mal op de Quickborn-Nettsiet üm: www.quickborn-vereinigung.de

Joon Plattsnackers vun’t Kreativhuus

Text: Heiko Thomsen

Wöörverkloren

af – ab
alleen – allein
anner – andere
bannig – sehr
Bidrag – Beitrag
Bispill – Beispiel
blifft – bleibt
buten – außen
ditmal – diesmal
Fahn – Fahne
förwiss – bestimmt
glieks – gleich
güstern – gestern
hölpen – helfen
hüüttodaags – heutzutage
jichtenswo – irgendwie
Johrsgaav – Jahresgabe
kieken – gucken
Liddmaten – Mitglieder
liekers – dennoch, trotzdem
Lüüd – Leute
man – aber
Narichten – Nachrichten
Nettsiet – Internetseite, Homepage
nie’et – neues
ok – auch
op – auf
plegen – pflegen
Quickborn – ›sprudelnde Quelle‹
Reeg – Reihe
Saken – Sachen
schreven – geschrieben
Tietschrift – Zeitschrift
Töllerrand – Tellerrand
töven – warten
Towass – Zuwachs
ümkieken – umsehen
ünner – unter
utgeven – vergeben
Veranstalten – Veranstaltung
Vereen – Verein
verleden – vergangen
vör allen – vor allem
Vörjohr – Frühjahr