Plattdüütsche Bökermess 2026

Muttst di wunnern, wat dat so allens gifft! In Hamborg gifft dat to’n Bispill Anfang November jümmer en plattdüütsche Bökermess in’n wunnerschönen Lichtwarksaal (Neanderstraat 22). För twee Daag verwannelt sik de dore Saal denn in en plattdüütsch Paradies to’n Kieken, Klönen un Kopen – dütmal al to’n 27. Mal.

Verlagen ut acht Bunnslänner wiest plattdüütsche Böker, Höörböker, Tietschriften, Postkorten (mit Snacks op Platt), Klenners, Lehrmaterial u.v.m. Gifft meist nix, wat dat dor nich gifft! Un wenn een mal wat Besünners för Wiehnachten söcht, is dor ok wiss dat Richtige dorbi. De plattdüütsche Bökerwelt is bunt: Dor gifft dat nich blots de olen Klassikers (Groth, Reuter u.s.w.), man ok niege Literatur to’n Högen un Nadinken. Dor is för jeedeen wat dorbi. För lütte un för utwussen Lüüd.

Op de Böhn warrt to jede halve Stunn niege Böker vörstellt un Benita Brunnert maakt dreemal an’n Nameddag buten rund üm den Lichtwarksaal en Rundgang, op den se dörtig Minuten lang op Platt wat över »Hanna un de Hummel« vertellt (Klock halvig twee, halvig dree un halvig veer geiht’t los) – un dat Best heff ik meist noch vergeten: De Veranstalten kost nix för de Besökers. Dat Ganze warrt mööglich maakt dörch de Carl-Toepfer-Stiftung, Hamburg. Kinners, wat hebbt wi doch för’n Glück, dat de bi uns hier in’e Stadt sitt!

Wokeen nu Lust kregen hett, sik sülvst mal ümtokieken op de plattdüütsche Bökermess in’n Lichtwarksaal, kann sik den Termin al vörmarken. De plattdüütsche Bökermess 2026 is an’n 7. un 8. November vun meddags Klock 12 bet nameddags Klock fiev. Hengahn, kieken, tolustern, klönen un kopen!

Mehr Infos op: www.carltoepferstiftung.de

Joon Plattsnackers vun’t Kreativhuus

Text: Heiko Thomsen

Wöörverkloren

al – schon
Bispill – Beispiel
blots – bloß, nur
Bökermess – Büchermesse
Bunnslänner – Bundesländer
buten – draußen
Daag (Mz.) – Tage
denn – dann
dörtig – dreißig
dore – dortige
een – einer, man
free – frei, kostenlos
gifft – gibt (von: geven)
Groth – Klaus Groth (1819–1899)
Hanna un de Hummel – Buchtitel von Benita Brunnert
harr – hätte
hengahn – hingehen
högen – (sich) freuen, ergötzen
jümmer – immer
kieken – gucken
Kinners! – hier: Ausruf der Freude (wörtlich: Kinder!)
Klenner – Kalender
klönen – plaudern, sich zwanglos unterhalten
kopen – kaufen
kort – kurz
lütt – klein
man – aber
meist – fast
nadinken – nachdenken
Nameddag – Nachmittag
niege – neue
ok – auch
op – auf
Reuter – Fritz Reuter (1810–1874)
sitt – sitzt (von: sitten)
söcht – sucht (von: söken)
Stunn – Stunde
sülvst – selbst
Tietschriften – Zeitschriften
tolustern – zuhören
to’n – zum
ut – aus
Veranstalten – Veranstaltungen
vertellen – erzählen
vörmarken – vormerken
wat – etwas
wieder – weiter
wiesen – zeigen
wokeen – wer

Der Plattkrink trifft sich donnerstags von 18:30 bis 20 Uhr im Kreativhaus Eimsbüttel, Telemannstraße 10 (jedoch nicht in den Hamburger Schulferien und am 3. Donnerstag im Monat). Interessierte können einfach vorbeikommen.