Eimsbütteler Buddelbreven: Vertell doch mal!

Jeed Johr in’n Juni heet dat bi’n NDR un in’t Ohnsorg-Theoter wedder »Vertell doch mal!« Düt­mal al to’n 38. Mal un de Opgaav is »Kuddelmuddel«. Anfungen hett de Schrievwettstriet 1989 mit dat Thema »Wiehnachten tohuus«. Domals geev dat noch twee düütsche Staten. Över de Johren hebbt in’n Dörsnitt jeed Johr wiet över dusend Lüüd mitmaakt, man in de letzten Tiet sünd de Tallen bi de Mitmakers vun Johr to Johr ringer worrn. 2024 weren dat blots noch 700 Insennen, liekers warrt de besten 25 Geschichten vun en Jury utwählt un kaamt in en Book rin, de beröhmte Vertell-doch-mal-Anthologie.
Un jeed Johr is dat Jiepern wedder groot, wokeen woll ditmal mit sien Geschicht in dat Book rinkamen is. Siet 2017 gifft dat ok en »Ü 18«-Pries för junge Lüüd ünner 18.

Verleden Johr güng de 1. Pries na Eimbüddel. Felicitas Schröder vun’t Kreativhuus hett em kregen för ehr Geschicht »Fohrgemeenschop«. In düsse Geschicht beschrifft se de Reakschonen vun de Lüüd, wenn in’n Tog een an’t Bedeln is. Wi hebbt dat wiss ok al mal beleevt un uns schaamt, dat wi wegkeken hebbt. Ach jo, de Siegergeschichten warrt dütmal an’n 14. Juni in en Matinee in’t Ohnsorg-Theoter vörstellt. Villicht hebbt ji jo Glück un kriegt noch en Koort af. Felicitas Schröder hett ok wedder en Geschicht na’n NDR henschickt.

Joon Plattsnackers vun’t Kreativhuus

Text: Heiko Thomsen

Wöörverkloren

al – schon
bedeln – betteln
beleven – erleben
beschrieven – beschreiben
blot – bloß, nur
Dörsnitt – Durchschnitt
dusend – tausend
düsse – diese
dütmal – diesmal
een – hier: einer, jemand
Fohrgemeenschop – Fahrgemeinschaft
geev – gab
gifft – gibt
groot – groß
güng – ging
heet – heißt
Insennen – Einsendungen
ji – ihr
jiepern – gieren
Koort – Karte
liekers – dennoch, trotzdem
Lüüd – Leute
man – aber
ok – auch
Opgaav – Aufgabe
över – über
Pries – Preis
Reakschonen – Reaktionen
rinkamen – hereinkommen
ring – gering
schamen – schämen
schrieven – schreiben
siet – seit
Tallen – Zahlen
Tiet – Zeit
Tog – Zug
ünner – unter
verleden – vergangen
vertellen – erzählen
warrt – werden
wedder – wieder
wegkieken – weggucken
wi – wir
wiet – weit
wiss – sicher, gewiss
wokeen – wer
woll – wohl