Eimsbütteler Buddelbreven: Plattdüütsch Dag in’t Kreativhuus Eimbüddel

An’n 18. April is wedder »Plattdüütsch Dag« – nu al to’n föfften Mal. Ünner dat Motto »platt för de stadt« gifft dat ok dütmal wedder en ganzen Barg Veranstalten – nich blots in’t Ohnsorg-Theoter un in de Nedderdüütsche Bökerie, ne ok bi uns in Eimbüddel.

Organiseert warrt dat allens wedder vun’n »Plattdüütschroot för Hamborg«, de ok en Flyer tohoopstellt, wo een nipp un nau nakieken kann, wat düssen Dag so allens op’e Been stellt warrt. De bummelig 100.000 Plattsnackers, de dat vundaag noch in de Stadt gifft, köönt ut mehr as föfftig verscheden Veranstalten utwählen – Veranstalten de wiest, dat Plattdüütsch in Hamborg jümmer noch tohuus un lebennig is.

Vun Klock dree an sünd wi an’n 18.4. in’t Kreativhuus Eimbüddel in de Telemannstraat un freit uns op Besökers. Kaamt vörbi un bringt ok Frünnen un Familie mit. Bi uns köönt ji Geschichten un Leder hören un mit’nanner in’n Snack kamen – op Hooch oder eben ok op Platt.

Bi uns gifft dat allerhand to beleven – för lütte un för grote Lüüd. Nameddags Klock dree geiht dat los mit Kaffee un Koken un Klöönsnack. Ach ja, en olen Trecker gifft dat bi uns den Dag ok noch to bestaunen. Wat de hier schall? Nu, kaamt vörbi, denn warrt ji dat rutfinnen.

Joon Plattsnackers vun’t Kreativhuus

Text: Heiko Thomsen

Wöörverkloren

al – schon
allens – alles
an’n (an den) – am
beleven – erleben
Besöker – Besucher
bi – bei
blots – bloß, nur
Bökerie – Bücherei, Bibliothek
bummelig – knapp, ungefähr
Dag – Tag
een – man
föfften – fünften
föfftig – fünfzig
freien – freuen
Frünnen – Freunde
gifft – gibt
in’n Snack kamen – ins Gespräch kommen
in’t (in dat) – im
ji – ihr
jümmer – immer
kamen – kommen
Klock dree – Punkt drei
Klöönsnack – Smalltalk, Gespräch
Koken – Kuchen
lebennig – lebendig
Leder – Lieder
Lüüd – Leute
lütt – klein
mit’nanner – miteinander
nakieken – nachgucken
nameddags – nachmittags
ne – nein
nipp un nau – genau
nu – nun, jetzt
ok – auch
op – auf
schall – soll
tohoop – zusammen
tohuus – zuhause
ünner – unter
utwählen – auswählen
Veranstalten – Veranstaltung(en)
vörbei – vorbei
vundaag – heute
warrn – werden
wedder – wieder
wiesen – zeigen