Eimsbütteler Buddelbreven: Op’n Flohmarkt

»Wat wullt du för de Lamp hebben?«

»Fiefunföfftig.«

»Dat is to düer. Kiek di mal den Rost an.«

»Dat is keen Rost. Dat is Patina. Mid-Century-Stil.«

»Mid-Century? Bün ik ok. Man nich so afnutzt.«

»Wenn de di to afnutzt is, worüm wullt du ehr denn hebben?«

»Weet ik noch nich. Ik geev di fiefundörtig.«

»Ne, föfftig mutt ik hebben. Dat is Design. Space Age. Heff ik in’t Internet för tweehunnertföfftig sehn.«

»Weetst du denn, of se de ok för tweehunnertföfftig losworrn sünd?«

»Ne.«

»Denn giff mi de mal för veertig.«

»Ole Knickerbüdel! För fiefunveertig schasst ehr hebben, ok de Patina.«

»Denn man to! Hest ok noch ’n Büdel för mi?«

»Kost aver extra.«

So geiht dat to eenmal in’n Maand op’n Else-Rauch-Platz – un ok op all de annern Flohmarkten in’n Stadtdeel: Op’n Markt in’e Telemannschool oder op de Markten in’n Lehm- un Turmweg. Kannst gor nich fröh noog dor sien, de Hökers mit ehr Büdels sünd al dor mit de Nees in de Kisten un de Luup in de Hand. »Gold? Sülver? Hebbt Se Smuck? Schallplatten?« Dor geiht de gode Kraam weg in’n Nu. Muttst fix sien, wenn du wat Feins finnen wullt. En Schatt villicht, den du denn bi Bares für Rares verhökern kannst? Wat Besünners, wat di riek maakt? Ik heff Frünnen, de hebbt mal en fein Öölbild funnen un dor meist nix för betahlt. Kunnst sehn, dat dat wat Besünners weer. Se weren dormit bi’t Aukschoonshuus un de Lüüd dor weren bannig hiddelig, wiel se glöövt hebbt, dat dat vun en bekannten amerikaanschen Künstler weer. Kunn sössstellig sien. Müssen se aver röverschicken na New York för de Expertise. Veerdusend Euro schull dat kosten. Laat sik nich ännern. Denn wullen se dat versöken. Wat schall ik seggen? Weer allens för de Katt. Veerdusend Euro futsch. Nu bammelt dat Bild bi jüm över’n Eetdisch, is wunnerschöön un kickt jüm an. Dat is doch ok wat!

Joon Plattsnackers vun’t Kreativhuus

Text: Felicitas Schröder

Der Plattkrink trifft sich donnerstags von 18:30 bis 20 Uhr im Kreativhaus Eimsbüttel, Telemannstraße 10 (jedoch nicht in den Hamburger Schulferien und am 3. Donnerstag im Monat). Interessierte können einfach vorbeikommen.

Der Flohmarkt findet jeden 1. Sonnabend im Monat auf dem Schulhof statt. Nächste Termine: 5.9. und 3.10. jeweils 11–16 Uhr. Anmeldung unter: flohmarkt@kreativhaus-eimsbuettel.de

Wöörverkloren

afnutzt – abgenutzt
Aukschoonshuus – Auktionshaus
bammeln – hängen

bannig – sehr
betahlt – bezahlt (von: betahlen)
Büdel – Beutel, Tüte, Tragetasche
düer – teuer
Eetdisch – Esstisch
fix – schnell
geev – gebe (von: geven)
giff – gib (von: geben)
geiht – geht (von: gahn)
glöövt – glaubt (von: glöven)
hiddelig – aufgeregt, erregt
Höker – Händler
Katt, för de … ween – wertlos sein
kickt – guckt (von: kieken)
Knickerbüdel – Geizhals
Kraam – Trödelkram
Luup – Lupe
Maand – Monat
man – aber
meist – fast
mutt – muss (von: möten)
Nees – Nase
noog – genug
ok – auch
op – auf
riek – reich
röver – rüber, hinüber
schasst – sollst (von: schölen)
Schatt – Schatz
schull – sollte (von: schölen)
seggen – sagen
verhökern – verkaufen
verköfft – verkauft (von: verkopen)
versöken – versuchen