Eimsbütteler Buddelbreven: In’t kulinoorsche Bermudadreekant
Damit Plattdeutsch nicht ausstirbt, trifft sich im Kreativhaus wöchentlich ein „Plattdüütsch Krink“.
Von GastDüt Johr bün ik mal nich op Reisen gahn. Ik heff mi dacht, laat de annern man in Italien afsupen oder in Frankriek dörch dat Füer gahn, ik bliev in mien Eimbüttel, wo dat hitt noog is. Dor heff ik mien internatschonal Bermudadreekant för nix vör de Döör, sünnerlich wat Eten un Supen angeiht.
An’t Strateneck mutt ik al överleggen, will ik bi’n Afghaan ›Franzöösch‹ Croque mit heel veel Mayonnaise oder schall ik de Panssupp bi’n Törken op de annere Siet proberen? Nee, dat is mi to riskant. Wenn ik denn wiedergah, heff ik op 500 Meter de Utwahl twüschen dree greekschen, een laotschen, een vietnameeschen un dree italjeenschen Spieslokalen un een düütschen Fiensmecker-Restaurant. De Lüüd sitt in de Sünn vör de Döör, just so as in’n Süden. Bi de greekschen Lokalen gifft dat bannig veel Fleesch op’n Töller un de Lüüd sünd meist vull Ouzo un vergnöögt.
Wenn du dor nich duhn worrn büst, denn kannst wieder na den serbschen Footballkroog mit söven ünnerscheedlich Sorten Bölkstoff gahn un dat Wienkontor, wo de Lüüd fein an de Wienfatten sitten un grienig mit rode Backen in’n Sünnenschien an’t Wienglas nippt. Bit to’n Kroog, de so heet as dat Drinken, dat se verköfft, kümmst denn garanteert nich mehr.
Villicht is dat beter, düsse Fallen to ümschippern un bi een vun de asiaatschen oder italjeenschen Spieselokalen antoholen för Pasta, Pizza oder Pho oder in een vun den lüttschen Cafés för Kaffe un Koken. In dat Fiensmeckerlokal will ik man geern gahn, dor is dat bannig lecker, aver dat is to düer för mi. Mutt ik op mien Lottowinst töven.
Glieks üm de neegste Eck is so’n neemoodsch Café mit vele Fliesen an de Wänn. Mit Barista. De Footpadd dorvör is vull mit junge Lüüd, de utseht, as weren se mit en Bodderfohrt för Hipsters direktemang ut Berlin kamen. Se sitt op lüttje Schemels, de nix för ole Lüüd sünd. So blifft man ünner sik. Aver de Kaffe schall goot sien.
Wieder op de Osterstraat na Oosten to. Wat för ’n Utwahl an Cafés un Spieslokalen! Ik kann op Bistrostöhl kommodig französchen Café Creme slappern un mi de Lüüd ankieken, de vörbigaht oder op een vun dree witte Schemels in en minimalistisch witten Ruum mien Koken to go lepeln. Binnen hest dien Roh. Dor büst meist alleen. Gifft ok Cafés un Bäkereen mit portugieschen Galao oder lütte Kannen swarten Kaffe. As du meenst. För dien Hunger gifft dat mexikaansche Burritos oder chineesche Nudeln, groot un dick as Buukreems, kannst Thai-Curry un japaansch Sushi finnen un en fien libaneesch Köök geneten un di de Fingers na koreaansche Höhnkens licken. Un en lecker greeksch Gasthuus gifft dat ok noch mittenmang.
Wat wi nich hebbt, sünd amerikaansche Fleeschklümp in’t Rundstück un Solyanka. Dat muttst woanners söken.
Nu bün ik man eerst dat bövere Enn von de Osterstraat rünner kamen un al ganz dösig vun dat grote internatschonale Anbott in mien Bermudadreekant. Ik glööv, ik mutt na Edeka rin un mi en Büdel Frosta holen för tohuus. Oder villicht Beren, Bohnen un Speck?
Text: Felicitas Schröder
Joon Plattsnackers vun’t Kreativhuus
Wöörverkloren
afsupen – ertrinken
al – schon
Anbott – Angebot
bannig – sehr
Bermudadreekant – Bermudadreieck
Beren (Mz.) – Birnen
binnen – drinnen
Bölkstoff – scherzhaft: Alkohol
bövere – obere
Buukreems (Mz.) – Gürtel
dösig – benommen, schwindelig
düer – teuer
duun – betrunken
Enn – Ende
Fleeschklümp (Mz.) – Fleischstücke
Füer – Feuer
hitt – heiß
greeksch – griechisch
grienig – lächelnd
Höhnkens (Mz.) – Hühnchen
Köök – Küche
kulinoorsch – kulinarisch
lepeln – löffeln
Lottowinst – Lottogewinn
mittenmang – mittendrin
neemoodsch – neumodig
noog – genug
Rundstück – Brötchen
slappern – schlürfen
söken – suchen
sünnerlich – insbesondere
twüschen – zwischen
wieder – weiter
Wienfatten (Mz.) – Weinfässer
Der Plattkrink trifft sich immer donnerstags von 18.30 bis 20 Uhr im Kreativhaus Eimsbüttel, Telemannstraße 10 (jedoch nicht in den Hamburger Schulferien und nicht am 3. Donnerstag im Monat). Einfach vorbeikommen!
lokal. unabhängig. unbestechlich.
Eimsbüttel+
Mit Eimsbüttel+ hast du Zugriff auf alle Plus-Inhalte der Eimsbütteler Nachrichten. Zudem erhältst du exklusive Angebote, Deals und Rabatte von unseren Partnern.
