Eimsbütteler Buddelbreven: Imkern in Eimbüttel

As ik vör bummelig 20 Johr anfungen heff, mien egen Honnig up dan Wekenmarkt in de Grundstraat to verköpen, hebbt de Lüüd mi fraagt, wie dat mööglich is, in en grote Stadt wie Hamborg Immen to holen. De höört doch up’t Land up de Blomenwischen, de blöhenden Rapsfeller oder in de Heid.

To de Tiet weur ik just wegen mien ne’e Arbeitsstell vun mien ole Heimat Snevern (Schneverdingen) in de Lünborger Heid na Hamburg ümtrocken.

In Snevern heff ik al lange Johren mit veel Freid imkert. Anfungen bün ik 1988, un de Imkeree uptogeven, kunn ik mi do nich vörstellen. Also möss en Standplatz in Hamborg her. Na korte Tiet harr ik ok en Platz dicht bi Hagenbecks Tierpark funnen, un mien Immen kunnen de Reis na Hamborg antreden.

Mien Immen hebbt sik in Hamborg bannig wohlföhlt, dat is mi al na korte Tiet upfallen. Dat Nektarangebott is in Hamborg to veel beter as in Snevern, un dat is nich blots bi Hagenbecks Tierpark so. Good is dat ok an Bahnböschungen un up de Kerkhööf, dor gifft dat vele wille Blomen. Weil dat in Hamborg so good honnigen deit, maakt sik de Immen ok veel beter as in mien ole Heimat. Hamborg is för de Immen en lütt’t Paradies. De Aarnt is hier bummelig dree mal so groot, ok wegen de velen Linnen an de Straten, de in Sommer blöht.

Wenn ji mi nu fraagt, wo een bi’t Inköpen goden Honnig an kenn’ kann, denn raad ik jo, kiekt up dat Glas, ob dor de Naam vun dan Imker upsteiht un ob de Honnig ut Düütschland is. Dan Honnig künnt ji mit good’t Geweten köpen.

Un wenn nu een vun jo Lust kregen hett, Imker to werden, denn künnt ji jo bi dan neegsten Imkervereen künnig maken, wat ji dorför allens bruken doot. Up jeden Fall is dor en Imkerkurs för nödig, un een mutt weten, dat is mit’n ganzen Barg Arbeit verbunnen.

Joon Plattsnacker vun’t Kreativhuus

Text: Rolf Friedrich

Wöörverkloren

Aarnt – Ernte
anfungen – angefangen
al – schon
allens – alles
as – als
bannig – sehr
beter – besser
blöhen – blühen
Blomenwischen – Blumenwiesen
bruken – brauchen
bummelig – knapp, ungefähr
dan (Heidjer Platt) – den, dem
dorför – dafür
en (als unbestimmter Artikel) – ein, eine …
een (als Zahlwort) – ein, eine …
een (als Pronomen) – man
egen – eigen
för – für
Freid – Freude
Geweten – Gewissen
Honnig – Honig
holen – halten
ik – ich
Immen – Bienen
Imkeree – Imkerei
inköpen – einkaufen
ji – ihr
jo – euch
just – gerade
Kerk (Heidjer Platt) – Kirche
Kerkhööf – Friedhöfe
köpen – kaufen
kort – kurz
künnig – kundig
Linnen – Linden
lütt – klein
Lüüd – Leute
Lünborger Heid – Lüneburger Heide
na – nah
Naam – Name
maken – machen
mutt – muss
neegsten – nächsten
nödig – nötig, erforderlich
ok – auch
raden – raten
Rapsfeller – Rapsfelder
Straat – Straße
Straten – Straßen
Tiet – Zeit
to veel (Heidjer Platt) – sehr viel
ümtrecken – umziehen
up – auf
up’t (up dat) – auf’s
vele – viele
verbunnen – verbunden
Vereen – Verein
vör – vor
Wekenmarkt – Wochenmarkt
weten – wissen
weur – war