Eimsbütteler Buddelbreven: De HVV un ik – dat schlumpt nich!

Juli 2026, 27 Grad, Klock twee an’n Nameddag. Ik mutt na’n Orthopäden hen. Heff mi in’n Winter de Knaken braken (Oberschenkelhalsbruch). Schöön kommodig mit Taxi fohren – so heff ik mi dat vörstellt. Man Pustekoken! Keeneen geiht an’t Telefon. Ik also hen na’n 4er-Bus, de höllt an’n Schlump, denn rin in de U2 bet Hagenbeck un mit ’n Bus noch een Statschoon. Ik bün nich goot tofoot, mi is swiemelig. Man de fief Minuten in’n Bus müss ik eegentlich henkriegen. De 40 Grad maakt mi denn aver doch böös to schaffen. Wull de HVV nich eegentlich Klimaanlagen inbuen?

An’n Schlump mutt ik mit de Rulltrepp eerstmal na ünnen. De röögt sik aver nich, is in »Wartung«. Also hen na’n Fohrstohl, dor hangt en Schild mit rode Schrift un grote Bookstaven: »DEFEKT!« Nu blots nich hibbelig warrn, denk ik. Ik stieg de Trepp rop, as lütte Kinner dat maakt, en Foot toeerst un denn den annern achteran, warr anrempelt, mutt mi fasthollen. Na en Ewigkeit kaam ik endlich bi de U3 an. Den ersten Deel heff ik schafft! Nu noch wieter na de U2. De neegste Rulltrepp. Man ok de is in »Wartung« un – meist nich to glöven – de Fohrstohl is twei. – HVV, du geihst mi sowat vun op’n S***! 

Wat schall denn eerst en Rullstohlfohrer seggen?! Wedder Treppenstiegen, man ik heff keen Knööv, mien Hannen un mien Knee bevert. Opletzt kaam ik doch noch an’n Bahnstieg an, sett mi mööd op en Bank. Schöön köhl hier ünnen! Na veer Minuten kümmt de U2. Instiegen, hensetten. Tosehn, dat ik mi gau wedder vermünnern kann. Bi Hagenbeck is de Mann mit de Karsberen wedder dor. Ik nehm glieks een Kilo. De Rulltrepp funktschoneert ganz wunnerbor. Ik dank di, HVV!

Man wo is nu de Busstoppstell. De is nich mehr dor … De ganze Koppelstraat bet hooch na’n Siemersplatz hebbt se opreten un afsparrt; de Ersatsstoppstell is 300 Meter weg. De Stoppstell, wo ik normalerwies utstiegen mutt, is blots 100 Meter weg. Mit dat Kilo Karsberen un de sengen Hitt bruuk ik söventeihn Minuten; bün fix un fardig, ehr ik tohuus ankaam. Fröher heff ik för den Weg blots 7 Minuten bruukt. Fröher …  Jo, fröher is siet fief Maanden mien leevst Woort. Jümmer wedder mutt ik anhollen. Mi is swiemelig un ik heff keen Knööv mehr. Keen Bank wiet un siet! Un denn ok noch de Treppen rop bet to’n tweten Stock … 

HVV, du geihst mi sowat vun op’n S***, dat mutt ik di mal seggen!

Joon Plattsnackers vun’t Kreativhuus

Text: Susann Krüger

Wöörverkloren

achteran – hinterher
afsparren – absperren
anhollen – anhalten
Bahnstieg – Bahnsteig
bet – bis
bevern – zittern
blots – bloß, nur
Bookstaven – Buchstaben
bruukt – braucht (von: bruken)
Deel – Teil
ehr – ehe, bevor
fasthollen – festhalten
fix un fardig – fix und fertig
Fohrstohl – Fahrstuhl
glieks – gleich
glöven – glauben
Hannen – Hände
hibbelig – nervös
Hitt – Hitze
inbuen – einbauen
instiegen – einsteigen
Karsberen – Kirschen
keeneen – keiner, niemand
Klock twee – zwei Uhr
Knaken – Knochen
Knee – Knie
Knööv – Kraft
köhl – kühl
kommodig – bequem
Maand – Monat
man – aber
meist – fast
mööd – müde
Nameddag – Nachmittag
neegste – nächste
ok – auch
opletzt – schließlich
oprieten – aufreißen
Pustekoken – Pustekuchen
rin – rein
röögt – rührt sich (von: rögen)
Rullstohl – Rollstuhl
Rulltrepp – Rolltreppe
schlumpen – klappen, gelingen
seggen – sagen
sengen – sengend
Statschoon – Station
Stoppstell –Haltestelle
swiemelig – schwindelig
ünnen – unten
toeerst – zuerst
tofoot – zufuß
twei – kaputt, defekt
utstiegen – aussteigen
vermünnern – ermuntern
warrn – werden
wedder – wieder
wiet un siet – weit und breit
wieter – weiter

Der Plattkrink trifft sich donnerstags von 18:30 bis 20 Uhr im Kreativhaus Eimsbüttel, Telemannstraße 10 (jedoch nicht in den Hamburger Schulferien und am 3. Donnerstag im Monat). Interessierte können einfach vorbeikommen.